 |
| హోయా బాసియూ... రొమేనియాలో మిస్టరీ అడవి (image credit - twitter - Monica Wilcox) |
Hoia Baciu Hunting Forest: వనంలో వేట కామన్. కానీ, వనమే వేటాడితే అది చిత్రమే. అక్కడికి వెళ్లడం ఓ సాహసం. తిరిగిరావడం ఓ ఛాలెంజ్. ఇప్పటివరకూ లోపలికి వెళ్లి, ఎలాంటి సమస్యా లేకుండా బయటకు వచ్చిన వాళ్లు ఒక్కరూ లేరట. అందుకే ప్రపంచం దృష్టిని ఆకర్షించింది రొమేనియాలోని హోయా బాసియూ హంటింగ్ ఫారెస్ట్. ఆ అడవి విశేషాలేంటో, అది ఎందుకు హంటింగ్ ఫారెస్ట్‌గా మారిందో తెలుసుకుందాం. "దయచేసి రాత్రివేళ ఆ అడవిలోకి వెళ్లొద్దు" ఇదీ... రొమేనియా జనం చెప్పే మాట. "ఆ అడవిలో అంతుబట్టనిది ఏదో ఉంది" ఇదీ పరిశోధకులు చెప్పే మాట. అక్కడ ఏముంది? అర్థరాత్రి అరణ్యంలోకి వెళ్తే ఏమవుతుంది?
రొమేనియా. విస్తీర్ణంలో మన తెలుగు రాష్ట్రాల కంటే కాస్త పెద్దగా ఉండే దేశం. యూరప్‌లోని అందమైన, ఆహ్లాదకరమైన దేశాల్లో ఇదీ ఒకటి. చుట్టూ పర్వతాలు, పచ్చిక బయళ్లు, అడవులూ, సముద్ర తీరాలు,... ఎటు చూసినా పచ్చదనంతో ఆకట్టుకుంటుంది ఈ దేశం. రొమేనియాలో దాదాపు 40 దాకా పర్యాటక ప్రాంతాలున్నాయి. ఫేమస్ బీచ్‌లు, పురాతన భవనాలు, చర్చిలకు లెక్కే లేదు. ఎన్ని టూరిజం స్పాట్‌లు ఉన్నా... ఇక్కడి ఓ చిట్టడవి మాత్రం ప్రపంచం దృష్టిని ఆకర్షిస్తోంది. అదే "హోయా బాసియూ హంటింగ్ ఫారెస్ట్" వాయవ్య రొమేనియాలోని 3 చదరపు కిలోమీటర్లలో ఉంది ఈ అడవి. స్థానికంగా దీన్ని రొమేనియా బెర్ముడా ట్రయాంగిల్ అని అంటారు. ఎందుకంటే వన్స్ ఇందులోకి ఎంటరైతే... అంతా అయోమయంగా మారుతుందంట. అలా ఎందుకో మున్ముందు తెలుసుకుందాం.
చిన్న అడవే కావడంతో... ఇందులో జంతువులేవీ ఉండవు. కానీ... ఎన్నో వింతలూ, విశేషాలకు ఇది కేరాఫ్ అడ్రస్. ఈ అడవి మధ్యలో గుండ్రంగా ఉన్న చిన్న మైదానం ఉంటుంది. అదే అన్ని వింతలకూ కారణమవుతోంది. పరిశోధకుల నోళ్లలో నానుతూ... చిత్రమైన చర్చలకు దారితీస్తోంది. ఈ మైదానం చుట్టూ చెట్లు ఉన్నా... మైదానంలో మాత్రం గడ్డి తప్ప ఏమీ పెరగట్లేదు. 200 ఏళ్ల కిందట ఇక్కడ ఓ ఎగిరేపళ్లెం దిగిందనీ... దాని శక్తి వల్లే, ఇందులో చెట్లు పెరగట్లేదనీ చెబుతుంటారు స్థానికులు. జనం మాటల ప్రకారం... ఎగిరేపళ్లెం దిగేముందు... ఇక్కడ ఓ గొర్రెలకాపరి తిరిగేవాడు. ఆ రోజు 200 గొర్రెల్ని తనతో తీసుకెళ్లాడు. సడెన్‌గా అతను, ఆ గొర్రెలూ అదృశ్యమయ్యాయి. అది గ్రహాంతరవాసుల పనే అని నమ్ముతున్నారు స్థానికులు. హోయా అంటే మైదానం, బాసియూ అంటే గొర్రెల కాపరి అని అర్థం. ఈ అడవి అతని పేరుతోనే ఫేమస్ అయినా... ఈ మిస్సింగ్ స్టోరీకి సంబంధించి మాత్రం ఎలాంటి ఆధారాలూ లేవు.
ఎన్నో పరిశోధనలు:
1960లో బయాలజీ ప్రొఫెసర్‌ అలెగ్జాండ్రు సిఫ్ట్‌ను ఈ అడవి ఆకర్షించింది. ఫారెస్టులో రాత్రివేళ ఎరుపు, నారింజ రంగు లైట్లు వెలుగుతూ ఉంటాయని స్థానికులు చెబుతుంటారు. అవేమిటన్నది తెలుసుకునేందుకు ఆయన తరచూ చెట్లలోకి వెళ్లేవాడు. అడవి మధ్యకు చేరగానే... అయస్కాంత శక్తి తనను లాగేస్తున్నట్లు ఆయనకు అనిపించేది. తన అన్వేషణలో సిఫ్ట్ చాలా రకాల ఫొటోలు తీశాడు. వాటిపై పరిశోధన సాగుతుండగానే... 1993లో చనిపోయాడు. సిఫ్ట్ చనిపోయిన కొన్ని రోజుల తర్వాత... చాలా ఫొటోలు కనిపించకుండా పోయాయి. అవి ఏమయ్యాయో ఎవరికీ తెలీదు. ఈ అడవి నుంచీ వేరే ప్రపంచాలకు మార్గం ఉందనీ, అందుకే ఇక్కడకు UFOల్లో గ్రహాంతరవాసులు వస్తున్నారని నమ్ముతున్నారు జనం.
1968, ఆగస్టు 18న జరిగిందో వింత. ఆ రోజు మిలిటరీ టెక్నీషియన్... ఎమిల్ బార్నియా ఈ అడవిలో తిరగసాగాడు. సరిగ్గా అప్పుడే... గుండ్రటి మైదానం పైన ఏదో ఎగురుతూ కనిపించింది. వెంటనే దాన్ని ఫొటో తీశాడు. ప్రపంచానికి చూపించాడు. ఇలాంటి ఫొటోల్ని గ్రాఫిక్స్‌తో సృష్టించడం సాధ్యమే. అందుకే దీన్ని చాలా మంది నమ్మలేదు. పరిశోధకులు ఆ ఫొటోపై ప్రయోగాలు చేశారు. చివరకు అది నిజమైనదే కావచ్చని భావించారు. అదే నిజమైతే... ఆ రోజు మైదానంపై ఎగురుతూ వెళ్లిన పరికరమేంటి? ఎగిరేపళ్లెమా? అలాగైతే... గ్రహాంతరవాసులు ఉన్నట్లేగా. కానీ... వాళ్లు ఉన్నట్లు ఇప్పటివరకూ కచ్చితమైన ఆధారాలు లేవు.
హోయా బాసియూ అడవిలో పారానార్మల్ యాక్టివిటీ ఎక్కువగా జరుగుతోంది. అంటే... అనూహ్య సంఘటనలు, భయానక పరిస్థితులూ ఏర్పడుతున్నాయి. అడవిలోకి వెళ్తే... లేనివి ఉన్నట్టు... ఉన్నవి లేనట్టూ అనిపిస్తుందట. చాలా మంది తాము తీసిన ఫొటోల్లో దెయ్యాలూ, UFOలూ ఉన్నాయని చెబుతారు. మామూలు కళ్లకు మాత్రం అవి కనిపించవు. వాళ్లు తీసిన ఫొటోలు నిజమైనవే అని నమ్మేలా ఉండవు. జనం భయాలకు తగ్గట్లే... ఇక్కడి చెట్లు కూడా చిత్రంగా ఉంటాయి. వీటి కాండాలు ఇంగ్లీష్ లెటర్ యూ ఆకారంలో వంగి ఉంటాయి. చాలా చెట్ల కొమ్మలు కూడా వంపులు తిరుగుతుంటాయి. ఎందుకన్నది మాత్రం పరిశోధకులకు అంతుచిక్కలేదు.
ఇలాంటి వంపులు తిరిగే చెట్లే... మన దేశంలో కూడా ఉన్నాయి. ఉత్తరప్రదేశ్‌... మధురా జిల్లాలో రాధాకృష్ణుల ఆలయం ఉంది. దాన్నే నిధివన్ టెంపుల్ అంటారు. ఈ ఆలయ తలుపుల్ని సూర్యాస్తమయానికి ముందే మూసేస్తారు. రాత్రివేళ ఎట్టిపరిస్థితుల్లో ఎవరూ లోపలికి వెళ్లకుండా... మూడు రకాలుగా ద్వారబంధనాలు ఉంటాయి. ఆలయం చుట్టూ చిట్టడవి ఉంటుంది. ఆ అడవిలో చెట్లు కూడా వంపులు తిరిగి ఉంటాయి. రాత్రివేళ అక్కడకు వెళ్లిన వాళ్లకు అనారోగ్య సమస్యలు తప్పవు. కళ్లు పోతాయనీ, చెవుడు వస్తుందనీ, మరణం కూడా సంభవిస్తుందని స్థానికులు నమ్ముతారు. రాత్రివేళ ఆ చెట్ల మధ్యకు వెళ్తే నిజంగానే అలా అవుతుందా అన్నదానిపై ఆధారాలు లేవు. అక్కడి చెట్లు అలా ఉండటానికి సైంటిఫిక్ కారణాలేవీ తెలియట్లేదు.
రెండుచోట్లా... చెట్లపై ఇలాంటి ప్రచారం జరగడం ఆశ్చర్యకరమే. హోయా బాసియూ అడవి మధ్యలోకి వెళ్తే... సెల్‌ఫోన్లూ, దిక్సూచిలూ పనిచేయవు. అక్కడ దెయ్యాలున్నాయనీ, అతీత శక్తులు ప్రభావం చూపిస్తాయనీ నమ్ముతున్నారు జనం.
హోయా అడవిలోకి రాత్రివేళ వెళ్తే ఎమవుతుంది?:
"హోయా బాసియూపై జనం చెప్పేవన్నీ కట్టుకథలే. అసలక్కడ ఎలాంటి తేడా ఉండదు" అంటూ చాలా మంది పగటి సమయాల్లో ఈ అడవిలోకి వెళ్లారు. అలా కొట్టిపారేసిన వాళ్లు కూడా... తిరిగొచ్చాక రకరకాల కథలు చెప్పారు. ఒక్కొక్కరికీ ఒక్కో సమస్య వచ్చింది. కొందరికి ఒళ్లంతా దద్దుర్లు వచ్చాయి. కొందరికి కళ్లు తిరిగాయి. కొందరు వామ్టింగ్స్ చేసుకున్నారు. ఇంకొందరు ఒళ్లు కాలినట్లు, ఎవరో రక్కినట్లు ఫీలయ్యారు. కొందరేమో... తమను ఏదో బలంగా వెనక్కి లాగేసిందని చెప్పారు. కొందరు తమను ఎవరో ఫాలో అయ్యారని చెప్పారు. విపరీతమైన టెన్షన్, తలనొప్పి, కలవరం, కంగారు పడినవాళ్లు చాలా మంది. ఏదో ఒక అనుభవంతో వచ్చేవాళ్లే తప్ప... ప్రశాంతంగా బయటకు వచ్చిన వాళ్లు చాలా తక్కువ.
మనం వినాలే గానీ స్థానికులు చాలా కథలు చెబుతారు. ఎప్పుడో యాభయ్యో దశకంలో కొందరు రైతుల్ని దోపిడీ దొంగలు ఈ అడవిలో చంపేశారు. అప్పటి నుంచీ ఆ రైతుల ఆత్మలు... ప్రేతాత్మలై తిరుగుతున్నాయని జనం అంటుంటారు. అడవిలో ఏవేవో అరుపులు వినిపిస్తాయనీ, ఎవరో పిలుస్తున్నట్లు, ఏడుస్తున్నట్లు, నవ్వుతున్నట్లు అనిపిస్తుందనీ చెప్పేవాళ్లున్నారు. ఎక్కువ మంది వీటిని నమ్ముతుండటంతో... పారానార్మల్ యాక్టివిటీకి ఈ ఫారెస్ట్ కేంద్రంగా కనిపిస్తోంది.
అడవిలోకి వెళ్లాక తమకు గతం గుర్తొచ్చిందనీ, బయటకు రాగానే మర్చిపోయామనీ చెప్పినవాళ్లున్నారు. అడవిలో తిరుగుతుండగా... తాము మాయమయ్యామనీ, కాసేపటి తర్వాత మళ్లీ ప్రత్యక్ష మయ్యామని కొందరు చెప్పగా... తాము ఎక్కడెక్కడ తిరిగిందీ గుర్తులేదని చెప్పిన వాళ్లూ ఉన్నారు. మరో కథనం ప్రకారం... ఓసారి ఐదేళ్ల పాప ఆడుకుంటూ అడవిలోకి వెళ్లి మాయమైంది. ఎంతమంది వెతికినా దొరకలేదు. అదే పాప ఐదేళ్ల తర్వాత అడవిలోంచీ బయటకు వచ్చిందట. అప్పుడు ఏ డ్రెస్‌తో వెళ్లిందో, ఇప్పుడూ అదే డ్రెస్‌తో అంతే హైట్‌తో ఉంది. ఇన్నాళ్లూ ఎక్కడికి వెళ్లావని అడిగితే... తాను ఎక్కడికీ వెళ్లలేదని చెప్పిందట ఆ చిన్నారి.
పాప ఉదంతం ఎప్పుడు జరిగిందో ఎవరికీ తెలీదు. ఆధారాలు లేవు. స్థానికులు మాత్రం ఈ విషయాన్ని గుర్తుచేస్తూ ఉంటారు. కొందరైతే... తాము రాత్రివేళ అడవిలో ఏదో కాంతిని చూశామని చెబుతారు. మరి దాన్ని ఫాలో అయ్యారా అంటే మాత్రం... అది క్షణాల్లో మాయమైందని అంటారు. వాళ్లేమైనా చదువుకోని అమాయకులా అంటే... అందరూ అక్షరాస్యులే. మరెందుకు అలా చెబుతారన్నది అర్థం కాని విషయం.
పగటి పూటే ప్రమాదం అనుకుంటే... రాత్రివేళ కూడా అడవిలోకి వెళ్లిన వాళ్లున్నారు. ఓ టీవీ ఛానెల్ దీనిపై షో చేయమంటూ... ఓ కెమెరామేన్, రిపోర్టర్‌ను పంపించింది. వాళ్లు అడవిలోకి వెళ్లేముందే... చాలా మందిని వివరాలు అడిగి తెలుసుకున్నారు. మనసులో భయాలున్నా... రాత్రివేళ అడవిలోకి బయలుదేరారు. లక్కేంటంటే... వాహనం లోపలికి వెళ్లేందుకు చిన్నపాటి దారులున్నాయి. ఆ దారిలో వెళ్లిన వాళ్లు... అర్థరాత్రి వేళ... గుండ్రటి మైదానం దగ్గరకు వెళ్లారు. మైదానం చుట్టూ రకరకాల కెమెరాలు, పరికరాలూ అమర్చారు. అంతా చిమ్మచీకటి. కీచురాళ్ల అరుపులు. ఏం జరుగుతుందో, ఏమో అనుకుంటూ... మెల్లగా మైదానంలో అడుగుపెట్టారు. మొదట వాళ్లకు ఎలాంటి ఫీలింగూ కలగలేదు. "అబ్బే ఇక్కడ ఏమీ లేదు... జనం చెప్పేదంతా ట్రాష్" అనుకున్నారు. అంతలోనే రిపోర్టర్‌ను ఏదో శక్తి మెడపట్టి వెనక్కి లాగేసింది. ఒక్కసారిగా ఊపిరాడని పరిస్థితి వచ్చింది. ఎలాగొలా తప్పించుకొని... మైదానం నుంచీ బయటకు వచ్చేశాడు. ఆ తర్వాత అడవిలో వాళ్లకో ఎర్రటి లైటు కనిపించింది. రెండు సెకండ్లు మాత్రమే కనిపించిన ఆ లైట్ తర్వాత మాయమైందట. ఇదీ జరిగింది అంటూ... వాళ్లు చెప్పిన విషయాల్నీ, వాళ్ల ఫుటేజ్‌ను నిజమే అని కొందరు నమ్మగా... అంతా వట్టిదే అని కొట్టిపారేసిన వాళ్లూ ఉన్నారు.
మరో విదేశీ ఛానెల్ కూడా ఇలాగే ఓ బృందాన్ని రాత్రివేళ పంపింది. అడవి మధ్యలోకి వెళ్లకుండా... జస్ట్ ఎగిరేపళ్లాల్ని మాత్రం షూట్ చేసి తెమ్మంది. రాత్రివేళ ఆ బృందంలో ఒకర్ని ఏదో శక్తి వెనక్కి లాగేసిందట. అంతే... అందరూ కెమెరాల్ని వదిలేసి... పారిపోయారు. తెల్లారి వెళ్లి చూస్తే... ఎక్కడా కెమెరాలు కనిపించలేదు. వాళ్లు చెప్పిన విషయాలు కూడా ఎంతవరకూ నిజమన్నది ఇంకా తేలలేదు.
అన్నీ మిస్టరీలే!:
ఎగిరే పళ్లాలు, గ్రహాంతరవాసులు, దెయ్యాలూ, అదృశ్యాలూ, అతీంద్రియ శక్తులూ, పరికరాలు పనిచేయకపోవడం... ఇవన్నీ మిస్టరీగానే ఉన్నాయి. అడవిలోకి వెళ్లి వచ్చినవాళ్లంతా... తాము చెప్పేది నిజమే అంటుంటారు. కానీ... వాటిని నమ్మే పరిస్థితి ఉండదు. మరి హోయా బాసియూ మిస్టరీగా ఉండిపోవాల్సిందేనా? అందరూ అబద్ధాలే చెబుతున్నారా? సైంటిస్టులు ఏమంటున్నారంటే....
ఏ విషయమైనా ఆధారాలు ఉంటేనే నమ్మడం సైంటిస్టులకు అలవాటు. మరి ఈ అడవి విషయంలో వాళ్లు ఏం చెప్పారన్నది ఆసక్తికరం. 50 ఏళ్లుగా జరుగుతున్న పరిశోధనల ప్రకారం.... ఈ అడవిలోకి వెళ్లాలనుకునేవాళ్లు... ముందుగానే దీని చరిత్ర మొత్తం తెలుసుకుంటారు. ఫలితంగా... వెళ్లకముందే ఒక రకమైన టెన్షన్ మనసులో మొదలవుతుంది. ఇక లోపలికి వెళ్లాక ఏ అలికిడో, గాలి శబ్దమో వినిపించినా... అదేదో దెయ్యమే అని భావిస్తున్నారు. కొత్త ప్రదేశం కావడం, అందులోనూ అడవిలోకి వెళ్లడం వల్ల ఒకరకమైన ఒంటరితనం ఫీల్ కలుగుతుందన్నది వాళ్ల మాట.
జర్మనీ, ఫ్రాన్స్, అమెరికా, హంగేరీ వంటి దేశాల నుంచీ చాలా మంది పరిశోధకులు ఈ అడవిపై దృష్టి సారించారు. వింతవింత ఆకారాల ఫొటోలు తీశారు. ఎగిరే పళ్లాల వంటి UFOలను చిత్రీకరించారు. ఐతే... అవేవీ నిజ నిర్ధారణ పరీక్షల ముందు నిలబడలేకపోయాయి. ఏమీ లేకపోయినా ఉన్నట్లుగా భావిస్తూ ఫొటోలు తీశారనీ, మేఘాలనే ఎగిరే పళ్లాలుగా భావించారని కొట్టిపారేసినవాళ్లున్నారు. ఐతే... బీబీసీ లాంటి సంస్థలు కూడా ఈ అడవిని హంటింగ్ ఫారెస్ట్ అని చెప్పడం విశేషం. అందుకే ఇది ఇప్పటికీ ప్రపంచ టూరిస్టుల్ని ఆకర్షిస్తోంది. ఆమధ్య హాలీవుడ్ నటి నికోలస్ కేజ్ సినిమా షూటింగ్ రొమేనియాలో జరిగింది. పనిలో పనిగా... అడవిని కూడా చూసొచ్చింది ఆ బ్యూటీ.
ఫారెస్ట్ చుట్టూ అల్లుకున్న కథల్లో చాలావరకూ నమ్మదగినవి కావు. అంత చిన్న అడవిలో ఐదేళ్ల పాప తప్పిపోయి, ఐదేళ్ల తర్వాత దొరకడమన్నది వాస్తవ విరుద్ధం. పైగా చిన్నారి, మిస్సైనప్పుడు ఎలా ఉందో, ఐదేళ్ల తర్వాత కూడా అలాగే ఉండటం ఎలా సాధ్యం? అన్న ప్రశ్నకు సమాధానం లేదు. పాప పేరు గానీ, ఆమె తల్లిదండ్రుల వివరాలు గానీ చరిత్ర పుటల్లో లేవు. కొందరు చెబుతున్నట్లు గొర్రెల కాపరి మిస్సయ్యడాంటే ఓ అర్థముంది. అతనితోపాటూ 200 గొర్రెలు కూడా ఎలా మాయమవుతాయి? ఇది కూడా వాస్తవ విరుద్ధమే. అడవిలోకి వెళ్లగానే అదృశ్యమవుతారన్నదానికి కూడా ఆధారాలు లేవు. అలా మిస్సైన ఏ వ్యక్తి గురించీ రొమేనియా న్యూస్ పేపర్లలో ఎప్పుడూ ఒక్క వార్తా రాలేదు.
గుండ్రటి మైదానంలో మొక్కలు పెరగవన్నది స్థానికుల మాట. నిజానికి అక్కడ గడ్డి మొక్కలు పెరుగుతున్నాయి. అంటే.. అదో మైదానమే తప్ప చెట్లు పెరగవన్న మాట నిజం కాదు. అక్కడ ఎగిరేపళ్లెం వచ్చి వాలిందనడానికి ఆధారాలు లేవు. కచ్చితమైన డేట్ కూడా లేదు. మైదానంలో అధిక అయస్కాంత క్షేత్రాల ప్రభావంతోపాటూ, ఎక్కువ రేడియేషన్ ఉందనడానికి కూడా సైంటిఫిక్ ఆధారాలు లేవు.
సాధారణంగా మనందరికీ సెన్సేషన్ అంటే ఇష్టం ఉంటుంది. ఏదైనా రొటీన్‌కు భిన్నంగా ఉందంటే ఆసక్తి చూపిస్తాం. ఈ అడవిలోకి వెళ్లేవాళ్లు కూడా డిఫరెంట్ ఎక్స్‌పీరియన్స్ కోరుకుంటారు. అనూహ్యమైనది ఏదైనా జరగాలని అనుకుంటారు. ఎందుకంటే... ఆ థ్రిల్ కోసమే వాళ్లు లోపలికి వెళ్తారు. అక్కడ ఏమీ జరక్కపోతే కిక్కే ఉండదనుకునే వాళ్లు... ఏదో ఒకటి జరిగినట్లుగా భావించుకుంటూ వెనక్కి తిరిగొస్తున్నారు. అందువల్లే వాళ్ల మాటలకు తగిన ఆధారాలు దొరకట్లేదన్న వాదన వినిపిస్తోంది. ఐతే... ప్రాణాలతో బయటపడటమే కష్టమనుకుంటే... ఇక ఆధారాలు సేకరించడం ఎలా కుదురుతుందని ప్రశ్నించేవాళ్లూ ఉన్నారు.
ఇక ఎగిరే పళ్లేల విషయానికి వస్తే... అవి కూడా ఊహలే అనడానికి ఓ కారణం ఉంది. అడవికి 10 కిలోమీటర్ల దూరంలో క్లజ్-నపోకా ఇంటర్నేషనల్ ఎయిర్‌పోర్ట్ ఉంది. సహజంగా రాత్రివేళ వెళ్లే విమానాలకు లైట్లు వెలుగుతూ ఉంటాయి. వాటిని చూసి అక్కడి జనం ఎగిరేపళ్లాలుగా భావిస్తూ ఉండొచ్చంటున్నారు సైంటిస్టులు.
అడవిపై జరిగే నెగెటివ్ ప్రచారమే ప్రభుత్వానికి కలిసొస్తోంది. దేశ, విదేశీ పర్యాటకులు తరలివస్తున్నారు. అడవితోపాటూ... రొమేనియాలోని ఇతర టూరిస్టు స్పాట్‌లను కూడా చుట్టేస్తున్నారు.
జనంలో ఉన్న భయాల్ని పోగొట్టడానికి రొమేనియా ప్రభుత్వం ఈ అడవి చుట్టుపక్కల స్పోర్స్ట్‌ను అభివృద్ధి చేస్తోంది. ఆమధ్య ఓ బైకింగ్ పార్క్‌ను ఏర్పాటు చేసింది. దీంతోపాటూ రైడింగ్, గోల్ఫ్, పెయింట్‌బాల్, ఎయిర్‌సాఫ్ట్, ఆర్చరీ వంటి క్రీడా సౌకర్యాలు కల్పిస్తోంది. ఎన్ని చేసినా ఆన్సర్‌ లేని ప్రశ్నలు, కలవరపెట్టే భయాలు వెంటాడుతూనే ఉన్నాయి.
భయం అంటువ్యాధి లాంటిది. ఒకరికి ఉంటే, మిగతావాళ్లకూ వస్తుంది. హోయా బాసియూ విషయంలో అదే జరుగుతోంది. ధైర్యవంతులు కూడా అడవిలోకి వెళ్లగానే... టెన్షన్ పడిపోతున్నారు. మరి నిజంగానే ఆ అడవిలో సంథింగ్ ఉందా అంటే... అవునని గానీ, కాదని గానీ చెప్పలేం. ఏదైనా కళ్లతో చూస్తే తప్ప నమ్మం కాబట్టి.... ఎవరికి వాళ్లం స్వయంగా వెళ్లి తెలుసుకోవడమే బెటర్ ఆప్షన్.
