 |
| సన్ డూంగ్ కేవ్ (image credit - Youtube) |
Son Doong Cave: మీరో అసాధారణ సాహసం చేయాలనుకుంటున్నారా? ఎవరికీ సాధ్యంకానిది మీరు చేసి చూపించాలనుకుంటున్నారా? ఐతే... మీకోసమే సిద్ధంగా ఉంది ప్రపంచంలోనే అతి పొడవైన గుహ. అక్కడికి వెళ్లడమే ఓ సాహసం, లోపల పరిశోధించడం ప్రాణాలకే ప్రమాదం. అంతం ఎక్కడో తెలియని ఆ అతిపెద్ద గుహలో ఎన్నో వింతలూ, విశేషాలు. గ్రహాంతర గుహగా ప్రసిద్ధి చెందింది. దాన్ని వర్ణించేందుకు మాటలు చాలవు. చూసేందుకు రెండు కళ్లు సరిపోవు. డ్రోన్ కెమెరాలకు కూడా అందని చిత్రాలెన్నో. లోపలికి వెళ్లే కొద్దీ... ఆశ్చర్యం, అద్భుతాలు కలగలిసి అసాధారణ పరిస్థితులు అనుక్షణం అడ్డుపడతాయి. సినిమాల్లో గ్రహాంతర ప్రపంచాల్ని చూస్తుంటాం. మరి నిజంగా చూడాలంటే... ఆ గుహలోకి వెళ్లాల్సిందే.
మరో ప్రపంచానికి నిలువుటద్దంలా ఉండే గుహరాజం అది. భూమిపైనే ఉన్నామా అనిపించే విశాల నిశీధి లోకం అది. లక్షల సంవత్సరాల సుందర సుదూర స్వప్నం అది. పుడమిలోపల విచ్చుకున్న అందాల అద్భుతాల అజరామర సముదాయం ఆ చీకటి పాతాళం.
దట్టమైన అడవుల్లో... దారులన్నీ మూసివేస్తూ సాగే నదీ ప్రవాహం. ప్రకృతి ఒడిలో రూపుదిద్దుకున్న అసాధారణ ఆకారాల అంతరంగం. పాతాళ లోకాన్ని తలపించే భారీ శిల్పాకృతులను తాకుతూ.... భానుడి కిరణాలు ప్రవేశించేందుకు ప్రయత్నిస్తుంటే... అంతలోనే అడ్డుకుంటూ అల్లుకుపోయే మంచు తెరలు. శిలాయుగపు ఆనవాళ్లతో ఆశ్చర్యపరిచే అద్భుత ఇలాతల వింత... సన్ డూంగ్ కేవ్.
సన్ డూంగ్ కేవ్.... మన బొర్రా గుహలు, బెలుం గుహల్లాంటిదే. కాకపోతే, వాటికీ దీనికీ పొంతనే ఉండదు. దీని లోపల నదులున్నాయి. భారీ కొండలున్నాయి. చెట్లు, జీవరాసులూ... జలచరాలూ... జీవవైవిధ్యం... ఒక్కమాటలో చెప్పాలంటే... భూగర్భంలో వెలసిన నవ్య ప్రపంచం ఇది.
వియత్నాంలోని క్వాంగ్ బిన్హ్ ప్రావిన్స్‌లో దట్టమైన అడవిలో ఉంది ఈ అసాధారణ గుహ. ప్రపంచంలోనే అతి పొడవైన గుహగా 2009లో గుర్తింపు పొందింది. అప్పటి నుంచీ శాస్త్రవేత్తల పరిశోధనలు సాగుతూనే ఉన్నాయి. ఇది ఎంత పొడవుందో... ఎక్కడి వరకూ ఉందో ఎవరూ కనుక్కోలేకపోవడం విచిత్రమే.
ఈ గుహలో సహజసిద్ధ దృశ్యాలు, ప్రకృతిపరంగా జరిగిన మార్పుల్ని చూసిన పరిశోధకులు దీన్ని "గ్రహాంతర గుహ"గా పిలుస్తున్నారు. ఎందుకంటే... ఇందులోకి వెళ్లినవారికి... వేరే గ్రహంపై ఉన్నామా అన్న ఫీల్ కలుగుతుంది. అంత చిత్ర, విచిత్రంగా ఉంటుందీ కేవ్.
రాత్రివేళల్లో ఈ గుహలోంచీ ఆకాశాన్ని చూస్తే... ఆ దృశ్యసారూప్యమే వేరు.
ఈ గుహలో ప్రయాణం మాటల్లో చెప్పుకున్నంత తేలిక కాదు. సూర్యకాంతి ముందు భాగంలో మాత్రమే పడుతుంది. తర్వాతంతా చిమ్మచీకటే.
లోపల పెద్ద పెద్ద కొండలుంటాయి. ఒక్కోటీ సుమారు 40 అడుగుల ఎత్తుంటాయి. వాటి ముందు మనం చీమలంత చిన్నగా ఉంటాం. గుహే వింతనుకుంటే... ఈ కొండలు మనకు మరింత ఆశ్చర్యం కలిగిస్తాయి.
అడుగు భాగం మొత్తం నది ప్రవహిస్తూ ఉంటుంది. అందులో రకరకాల జలచరాలుంటాయి. ప్రాణాలకు తెగించే సాహసికులే తాళ్లూ, టార్చిలైట్లూ, ఇతర సరంజామా మోసుకుంటూ ఇందులోకి ఎంటరవుతారు.
ఎవరెస్ట్ పర్వతాన్ని ఎక్కిన వారి కంటే... ఈ గుహ లోపలికి వెళ్లిన వాళ్ల సంఖ్యే తక్కువంటే నమ్మగలరా? కానీ ఇది నిజం. ఎవరైనా సరే... మహా అయితే... ఓ కిలోమీటర్ వరకూ లోపలికి వెళ్లగలుగుతున్నారు. ఆ తర్వాత... క్యారేజ్ మోసుకుంటూ... తిరుగుప్రయాణమవుతున్నారు.
కొందరైతే... ఏం చేసైనా సరే... గుహను శోధిస్తామంటూ... లోపలే గుడారాలు వేసుకొని రోజుల తరబడి ఉంటున్నారు. అక్కడే తింటున్నారు, ఆ నదితోనే పోరాడుతున్నారు. కానీ... ప్రయాణం ముందుకు మాత్రం సాగట్లేదు. ఓ నాల్రోజులయ్యాక... ఇక తమవల్ల కాదనుకొని... వెనక్కి బయలుదేరుతున్నారు.
ఇంకొంతమంది ప్రకృతి ప్రేమికులు... డ్రోన్ కెమెరాలకు పనిపెడుతున్నారు. తాము వెళ్లలేని చోట్లకు డ్రోన్లను పంపిస్తూ... ఆ దృశ్యాల్ని మనకు చూపిస్తున్నారు. కనీసం అలాగైనా తమ తృష్ణ తీరుతుందన్న ఆశ వారిది.
ఈ సృష్టిలో మన భూమి... అత్యద్భుతమైనది. ఎన్నో వింతలకు పుట్టినిల్లు. వాటిలో ఒకటైన సన్ డూంగ్ గుహ భూమిలోపలి పొరల్లో ఏర్పడి ప్రపంచం దృష్టిని ఆకర్షిస్తోంది. ఇంతకీ... ఇంత పెద్ద గుహ ఎలా ఏర్పడేందుకు ఏయే పరిస్థితులు కారణమయ్యాయి? భూమి లోపల కిలోమీటర్ల దూరం వరకూ ఎలా విస్తరించింది? మొదటగా దీన్ని కనిపెట్టిందెవరు? తెలుసుకుందాం.
30 లక్షల సంవత్సరాల కిందటి నుంచీ భూమిలో ప్రవహించే నదుల వల్లే సన్ డూంగ్ కేవ్ ఏర్పడింది. నీటి రాపిడికి గుహ లోపల శిలలు కరిగిపోయి... ఖాళీ భాగం ఏర్పడింది. 40 అంతస్థుల భవనాలు కూడా పట్టేసేంత విశాలమైన మైదానాలున్నాయి ఈ గుహలో.
ఇవన్నీ సున్నపురాయి నేలలే. నీటి ప్రవాహంతో ఈ నేలలు... రకరకాలైన ఆకారాల్లో, ఆశ్చర్యపరిచే శిల్పాకృతుల్లోకి మారాయి. ఇక్కడికి వచ్చే పర్యాటకులు... రాళ్లలో రూపుదిద్దుకునే ఆకారాల్ని ఫొటోల్లో బంధించేందుకు ప్రయత్నిస్తుంటారు.
1991లో మొదటిసారి హోకాన్ అనే స్థానికుడు అడవుల్లో తిరుగుతూ ఈ గుహను చూశాడు. అతనికి దిమ్మ తిరిగినంత పనైంది. పాతాళానికి ఇటు నుంచీ దారి ఉందేమో అనుకున్నాడు. లోపల గ్రహాంతరవాసులు ఉన్నారేమోనని భ్రమపడ్డాడు. గుహ నుంచీ గాలి వీచే శబ్దాలు భయంకరంగా ఉంటాయి. నదీ ప్రవాహం గర్జిస్తున్నట్లు ఉంటుంది. అందువల్ల హోకాన్ లోపలికి వెళ్లలేకపోయాడు.
తానో పేద్ద గుహను చూశాననీ, అది అద్భుతంగా, భయంకరంగా ఉందనీ... తన ఊరోళ్లకి చెప్పాడు హోకాన్. వాళ్లెవరూ అతని మాటలు నమ్మలేదు. అదేంటో చూద్దామని ఎవరూ అతనితో వెళ్లలేదు. తాను ఒక్కడే గుహకు వెళ్లే సాహసం చేయలేక హోకాన్ కూడా సైలెంటైపోయాడు.
18 ఏళ్ల తర్వాత... 2009లో గుహల్ని పరిశోధించే శాస్త్రవేత్తల బృందానికి సన్ డూంగ్ సంగతి తెలిసింది. వెంటనే వాళ్లు పరిశోధన ప్రారంభించారు. గుహ లోపలికి వెళ్లి... రహస్యాల గుట్టు విప్పారు. అలా ఇదొకటి ఉందన్న సంగతి ప్రపంచానికి తెలిసింది. దాదాపు తొమ్మిది కిలోమీటర్ల పొడవు వున్న ఈ గుహ... 650 అడుగుల ఎత్తు, 490 అడుగుల వెడల్పు ఉందని తేలింది. ఫలితంగా ఇదే ప్రపంచంలో అతి పొడవైన గుహగా రికార్డులకెక్కింది. అమెరికా "A 747" జెట్ విమానం కూడా టేకాఫ్ అయ్యేంత విశాలంగా ఉంటుందీ గుహ.
ఈ గుహలో... 200 అడుగుల ఎత్తైన కాల్సైట్ గోడ ఒకటుంది. ఈ గోడను గ్రేట్ వాల్ ఆఫ్ వియత్నాం అని పిలుస్తున్నారు. దీని పక్కన నిల్చొని సెల్ఫీ తీసుకున్నా చాలు... ప్రపంచంలో అరుదైన సాహసం చేసిన వాళ్ల లిస్టులో మనమూ చేరిపోతాం.
సన్ డూంగ్‌ను కనుక్కోక ముందు... ప్రపంచంలో అతి పెద్ద గుహగా... మలేసియాలోని డీర్ కేవ్ (Deer Cave) గుర్తింపు పొందింది. అది కూడా చాలా గంభీరంగా ఉంటుంది. 2009వరకూ ఆ గుహను మించినది మరొకటి లేదని ప్రపంచమంతా భావించింది. ఎందుకంటే... సన్ డూంగ్ లాగే... డీర్ కేవ్ కూడా సహజసిద్ధ ప్రకృతి లక్షణాలతో ఆకట్టుకునేది. నెంబర్ వన్ కేవ్‌గా ప్రపంచ దేశాల్ని ఆకర్షించేది. ఇప్పుడా స్థానాన్ని సన్ డూంగ్ ఆక్రమించింది.
ఇంత పెద్ద గుహ వున్న వియత్నాంలోనే మరో కేవ్ కూడా ఉంది. అదే ఫోంగ్ హా (Phong Nha) గుహ. అత్యద్భుతంగా ఉంటుందది. సహజ ప్రకృతితోపాటూ... చక్కటి వాతావరణంతో ఆకట్టుకుంటుంది. ఐతే... ఫోంగ్ హా కంటే ఐదు రెట్లు పెద్దది సన్ డూంగ్ కేవ్.
సన్ డూంగ్ కేవ్ లోపలికి వెళ్లడమే కాదు... దాని దగ్గరకు వెళ్లడం కూడా సాహసమే. చుట్టూ దట్టమైన అడవులూ, నదుల మధ్య ఉంది ఆ గుహ. ఆ ప్రయాణం ఎలా సాగుతుందో... పచ్చటి ప్రకృతి మధ్య పర్యాటకులూ, సాహసికులు ఎలా వెళ్తారో తెలుసుకుందాం.
సన్ డూంగ్ అంటే పర్వతపు నది అని అర్థం. ఇప్పుడీ గుహ ప్రపంచ పర్యాటక ఆకర్షణ అయిపోయింది. ఏటా కొన్ని లక్షల మంది గుహ ముందుభాగాల్ని చూసేందుకు వస్తున్నారు.
ఈ గుహ పరిశోధన చాలా ఖర్చుతో కూడుకున్నది. ఒక్కసారి పరిశోధించి రావడానికి కూడా రెండు లక్షల రూపాయలకు పైగా ఖర్చవుతుంది.
లోపలికి వెళ్లేందుకూ, దగ్గరుండి అన్నీ చూపించేందుకు ప్రత్యేక ప్యాకేజీలున్నాయి. గైడ్లు కూడా ఉన్నారు. అయినా సరే... దీన్ని చూడగానే భయపడి... చాలా మంది ముందడుగు వెయ్యలేకపోతున్నారు.
లోపలికి వెళ్లాక... పైకప్పు కూలిపోతే, నదీ ప్రవాహం పెరిగిపోతే, ఏ భూకంపమో వస్తే... ఇలాంటి ఎన్నో అనుమానాలు పర్యాటకుల్ని భయపెడుతున్నాయి. ఐతే... లోపలికి వెళ్లొచ్చిన వాళ్లు మాత్రం... తిరుగులేని సాహసికులుగా నిలిచిపోతున్నారు.
నిజానికి ఈ గుహ సందర్శన ఎంతో ఆహ్లాదాన్ని కలిగిస్తుంది. ఇక్కడికి వెళ్లాలనుకునేవారు ముందుగా... బాన్‌డూంగ్ గ్రామం నుంచీ వెళ్లాల్సి ఉంటుంది. ఈ విలేజ్‌లో పట్టుమని వంద మంది కూడా ఉండరు. చుట్టూ ఎత్తైన కొండలు... దట్టమైన అడవి... మధ్యలో పచ్చటి పొలాలు, చల్లటి వాతావరణం ఈ గ్రామంలోంచీ వెళ్లేవారికి మానసిక ఉల్లాసం కలిగిస్తాయి.
కొంతదూరం వాహనాల్లో వెళ్లాక... కాలినడకన కూడా ప్రయాణం సాగించాల్సి ఉంటుంది. కొండలూ, గుట్టలూ ఎక్కుతూ... అడవుల్లో ట్రెక్కింగ్ చేస్తూ... గుహకు వెళ్లడం మరచిపోలేని అనుభూతి.
బాన్‌డూంగ్ గ్రామం... యునెస్కో గుర్తింపు పొందిన "ఫోంగ్ హా కే బాంగ్" నేషనల్ పార్కులో భాగంగా ఉంది. పర్యాటకులు అష్టకష్టాలు పడి ఈ గ్రామాన్ని దాటాక... కొంత దూరం నదిపై బోటులో ప్రయాణించాల్సి ఉంటుంది.
బోటులో ప్రయాణిస్తూ... గుహ చెంతకు చేరగానే... చల్లటి గాలులు మెల్లగా పలకరిస్తాయి. ప్రకృతి వింతల్ని పరిచయం చేస్తూ... ఎద పులకించేలా చేస్తాయి.
కాస్త లోపలికి వెళ్లగానే... బలమైన గాలులు అలా అలా వీస్తూ... సాహసం చేయరా ఢింబకా అంటాయి.
పూర్తిగా గుహ లోపలికి వెళ్లగానే... 30లక్షల సంవత్సరాల కిందటి సున్నపురాతి శిలలు సాదరంగా ఆహ్వానిస్తాయి.
ఈ గుహ చివర్లో ఉన్న... 200 అడుగుల ఎత్తైన కాల్సైట్ గోడ వరకే సాహసికులు వెళ్లగలిగారు. గోడ అవతల ఎలా ఉంటుందో ఎవరికీ తెలియదు. 2010లో ఓ బృందం గోడను దాటేందుకు ప్రాణాలకు తెగించినా ఫలితం లేకపోయింది.
ఈ గుహ మొత్తం 15 కిలోమీటర్లు ఉండొచ్చన్న అంచనాలున్నాయి. ఆ రహస్యాన్ని ఛేదించేందుకు ప్రయత్నిస్తున్నారు. ఆగస్టు తర్వాత... వానల వల్ల గుహలో నది నీటి మట్టం పెరుగుతుంది. అందువల్ల ఆగస్టు తర్వాత లోపలికి ఎవరికీ అనుమతి ఉండదు.
ఈ అద్భుత గుహ చెంత ఈమధ్యే ఓ హాలీవుడ్ సినిమా నిర్మాణం జరిగింది. అదే... కింగ్ కాంగ్ మూవీ.... "కాంగ్ స్కల్ ఐస్‌లాండ్" (Kong: Skull Island - Rise of the King). సినిమా లొకేషన్లకు ఆస్ట్రేలియా, హవాయ్ తర్వాత... వియత్నామే ది బెస్ట్ ప్లేస్ అని ఓ ప్రముఖ ఆన్‌లైన్ సంస్థ రేటింగ్ ఇవ్వడంతో... సన్ డూంగ్‌ను ఎంచుకుంది సినిమా యూనిట్.
పర్యాటకుల సౌలభ్యం కోసం ప్రభుత్వం ఇప్పటికే చాలా ఏర్పాట్లు చేసింది. త్వరలో గుహ లోపల కేబుల్ కార్‌ను వేయాలని నిర్ణయించింది. ఇందుకోసం 1500 కోట్ల రూపాయలతో ఓ ప్రాజెక్టు చేపట్టాలనుకుంటోంది. అదే జరిగితే... ఏ కష్టాలూ పడకుండానే గుహ మొత్తాన్నీ చూసిరావచ్చు.
కేబుల్ కార్ల టూరిజంలో వియత్నాంకి మంచి ట్రాక్ రికార్డే ఉంది. ఐతే ఇలాంటి పనులు చేసి, పర్యావరణాన్ని దెబ్బతీయొద్దనీ, సహజ సిద్ధ గుహను నాశనం చేయొద్దని పర్యావరణ ప్రేమికులు కోరుతున్నారు. ఏది ఏమైనా... సన్ డూంగ్ కేవ్... ప్రకృతి మనకిచ్చిన వరం. సహజసిద్ధ ఆహ్లాదానికి అసలైన చిరునామా.
